«Якім можа быць памятны знак на месцы знесенага дома Максіма Гарэцкага ў Горках?» З такім пытаннем мы звярнуліся да Антона Астаповіча, старшыні грамадскага аб’яднання «Беларускае добраахвотнае таварыства аховы помнікаў гісторыі і культуры».

– Як варыянт, можна прапанаваць наступнае. Вялікі палявы камень з добрай бронзавай шыльдай, – патлумачыў абаронца нацыянальнай памяці. – На шыльдзе можна зрабіць выяву Максіма Гарэцкага і размясціць адпаведны тэкст. Напрыклад, у якіх гадах пісьменнік у Горках вучыўся, працаваў і жыў.

Іншы варыянт – у памяць пра знесены дом на шыльдзе можа быць аўтэнтычная выява таго будынка.

Акрамя ўстаноўкі памятнага знака неабходна распрацаваць сістэму добраўпарадкавання тэрыторыі, на якой да нядаўняга часу стаяў дом Гарэцкага. Гэтая сістэма павінна пазначаць падмуркі знесенага дома. То бок жылы будынак страчаны, але стаіць знак, і абазначана горада-будаўнічая сітуацыя.

У практыцы гэта можа выглядаць як брукаванне ці плітка з самага рознага матэрыялу. Як варыянт – ландшафтны дызайн. То бок па контуры знесенага дома можна разбіць кветнікі ці то высадзіць спецыяльныя кусты, якімі фарміруюць партэры (растуць па 1-1,2 м увышыню).

– Найбольш аптымальнае рашэнне трэба выбраць, абапіраючыся на ландшафтную сі-туацыю на месцы, – удакладніў Астаповіч. – Варыянты ўстаноўкі памятнага знака я ўжо абмяркоўваў з начальнікам упраўлення культуры Магілёўскага аблвыканкама Анатолем Анатольевічам Сінкаўцом. Ён выказаў сваю адназначную пазіцыю: «Прыкладзем усе намаганні, каб памятны знак стаяў».

– Я ведаю, што Анатоль Анатольевіч – чалавек, які трымае сваё слова, – адзначыў Антон Астаповіч.

Як паведамляў у сваім мінулым нумары «УзГорак», памятны знак Максіму Гарэцкаму збіраюцца ўста-ляваць у Горках у сувязі са зносам жылога будынка па вуліцы Агранамічнай, д.3. Менавіта там і жыў у 1926-1928 гадах класік беларускай літаратуры.

Сваю прапанову аб форме, матэрыяле памятнага знака, тэксце на ім можа ўнесці кожны.

Ідэі прымаюцца на пошту: Гэты e-mail абаронены ад спам-ботаў. Для яго прагляду ў Вашым браўзеры павінна быць уключана падтрымка Java-script (аддзел культуры Горацкага райвыканкама) і на тэлефон: 8-02233-5-54-57.

Антон Валадзько, газета “УзГорак”