Пра праваабарончае асветніцкае грамадскае аб’яднанне “Рух “За Свабоду” і ягоную дзейнасць падчас выбараў у мясцовыя Саветы дэпутатаў, а таксама новую генерацыю айчынных палітыкаў ласкава пагадзіўся адказаць нашаму выданню намеснік старшыні ПАГА “Рух “За Свабоду” Юрась Губарэвіч. (на фота)

Добры дзень, Юрась. Распавядзіце, калі ласка, крыху нашым чытачам, як быў створаны Рух і якія людзі яго ўзначалілі?

Ідэя стварэння агульнанацыянальнага руху, які б аб’яднаў людзей з розных куткоў Беларусі, узнікла ў 2006 годзе падчас кампаніі па выбарах прэзідэнта. Узначаліў гэтае аб’яднання Аляксандр Мілінкевіч. Ягонымі намеснікамі сталі Віктар Карняенка і я. Ад самага пачатку мы імкнуліся стварыць арганізацыю з гарызантальнай структурай узаемадзеяння. То бок арганізацыю, у якой не было б жорсткага падпарадкавання з верху да нізу. Дзе б кожны суб’ект адчуваў сябе партнёрам у агульнай справе. З траўня 2007 году мы здзейснілі тры беспаспяховыя спробы зарэгістраваць Рух. Міністэрства юстыцыі з розных прычынаў адмаўляла нам. І толькі чацвёртая спроба была ўдалай. Такім чынам мы зарэгістравалі праваабарончае асветніцкае грамадскае аб'яднанне “Рух “За Свабоду”.

А што на сённяшні момант уяўляе з сябе “Рух “За Свабоду”?

На сёння Рух дзейнічае на тэрыторыі ўсёй рэспублікі, мае прадстаўнікоў у 60 гарадах краіны. Колькасць прыхільнікаў з 2006 года дасягнула каля 2000 чалавек. Актыўных удзельнікаў Руху зараз каля 1000 чалавек. Нашай арганізацыяй кіруе Рада, якая складаецца з 24 чалавек.

Выходзіць, што ПАГА “Рух “За Свабоду” – гэта адносна маладая грамадская структура. А ці шмат у ёй маладых кадраў, людзей, якія належаць да новага пакалення палітыкаў?

Сапраўдная хваля маладых палітыкаў пачалася пасля 2006 года. У той год прыйшло шмат маладых і актыўных людзей, якія жадалі змяніць Беларусь да лепшага. Асаблівасцю таго часу было тое, што ў палітыку прыйшло шмат людзей, якія нават не ведалі, што такое дэмакратычныя сілы. Людзі, якія прыходзілі да нас, даведваліся пра мэты і нашу дзейнасць, у большасці станавіліся прыхільнікамі нашай арганізацыі. На сёння ў Руху вялікая колькасць маладых людзей ва ўзросце 20-35 гадоў. Нягледзячы на такі ўзрост па пашпарце, гэтыя людзі маюць вялікі досвед грамадскай і палітычнай дзейнасці. Некаторыя з іх ўжо паспелі папрацаваць дэпутатамі раённых Саветаў альбо атрымаць падтрымку значнай колькасці людзей на выбарах у парламент. Найбольш вядомыя імёны: Алесь Зарамбюк з Мастоў, Сяргей Салаш з Барысава, палітолаг Алесь Лагвінец з Мінску. Падобныя ім маладыя лідэры працуюць ва ўсіх абласцях краіны.

Як Вы, Юрась, прыйшлі ў Рух і чым займаліся да гэтага?

Пачынаў я сваю грамадскую дзейнасць яшчэ ў студэнцкія гады ў Мінску, затым працягваў у Белаазёрску, адкуль я родам. У выбарчай кампаніі 2006 года я ўзначальваў Брэсцкі абласны штаб Аляксандра Мілінкевіча. З 2007 года стаў намеснікам Мілінкевіча. Першую вышэйшую адукацыю атрымаў у Мінску ў БНТУ па спецыяльнасці інжынер-электрык. Потым працягваў навучацца ў Львоўскім рэгіянальным інстытуце дзяржаўнага кіравання. Атрымаў там ступень магістра дзяржаўнага кіравання.

На гэтым тыдні будзе адбывацца галасаванне за кандыдатаў у дэпутаты мясцовых Саветаў. Які фармат удзелу Руху ў гэтых выбарах?

Прыхільнікі і сябры Руху бяруць актыўны ўдзел у сёлетняй выбарчай гонцы. 83 прадстаўнікі Руху вылучыліся ў якасці кандыдатаў у дэпутаты мясцовых Саветаў па ўсёй краіне. Зарэгістравана з іх было 65 чалавек. На сённяшні дзень удзел у выбарах працягваюць 62 чалавекі. Пераважная большасць з іх можа разлічваць на перамогу, бо ўжо не першы год працуе з выбарцамі на сваіх акругах.

Якую пазіцыю мае Рух і ягонае кіраўніцтва адносна “мытнага саюзу”? Ці выгадны ён для беларусаў?

Неабходна зазначыць, што найвялікшай праблемай нашага грамадства з’яўляецца адсутнасць аб’ектыўнай і ўсебаковай інфармацыі. Гэта тычыцца не толькі пытання “мытнага саюзу”, але і яго. Ні на тэлебачанні, ні на радыё мы не маем публічнай пляцоўкі для абмеркавання плюсоў і мінусаў, выгадаў і стратаў, якія атрымае кожны з нас ад “мытнага саюзу”. Адно можна сказаць дакладна. З уступленнем у мытны саюз з Расіяй, мы губляем магчымасць далучыцца да Сусветнай гандлёвай арганізацыі і Еўрапейскага саюзу. Не трэба забывацца таксама, што кожны грамадзянін адчуе на сабе рост коштаў на аўтамабілі, бо мыты на іх увоз зраўняюцца з расійскімі. Машына для простага беларуса ператворыцца ў сапраўдную раскошу, а не сродак перамяшчэння.

“Рух “За Свабоду” выступае за Еўрапейскі выбар для Беларусі. Скажыце, калі ласка, што можа даць Еўрасаюз нашай Айчыне?

Еўрапейскі саюз – наш значны геапалітычны сусед. ЕС можа даць не толькі магчымасць нашым прадпрыемствам завязаць прадуктыўныя кантакты з заходнімі партнёрамі, але дасягнуць еўрапейскіх стандартаў для нашых грамадзянаў у эканамічнай, сацыяльнай і экалагічнай сферах. ЕС можа даць нам магчымасць дыверсіфікаваць крыніцы паступлення энергарэсурсаў у Беларусь, каб не залежыць ад аднаго пастаўшчыка. Таксама мы атрымаем абарону нашых палітычных інтарэсаў. Нашы грамадзяне змогуць свабодна кантактаваць з грамадзянамі ЕС. У нас будзе бязвізавая прастора і свабода перамяшчэння.

Падзяліцеся, калі ласка, планамі, якія мае “Рух “За Свабоду” на бліжэйшыя два гады.

Найбліжэйшыя планы – удзел у прэзідэнцкіх выбарах, на якіх сябры Руху будуць вылучаць і падтрымліваць свайго кандыдата – Аляксандра Мілінкевіча. Далейшыя планы будуць залежаць ад вынікаў прэзідэнцкай кампаніі. А ўвогуле наша задача – дэмакратызацыя Беларусі, абарона незалежнасці і еўрапейскі выбар для нашай краіны.

Дзякуй Вам вялікі за адказы!

Гутарыла Галіна Будная